डोंगरगाँव : डोंगरगांव इलाका मा महिला स्व-सहायता समूह के संगे ठगी करइया एक झन 'ठगिया' ल आखिर डोंगरगाँव पुलिस हा महाराष्ट्र के नागपुर ले दबोच लिस हे। 2 साल ले लुका-छिपी खेलत रहिस, फेर कानून के हाथ ह एतका लंबा होथे कि नागपुर के गली ले निकाल के डोंगरगांव थाना पहुंचा दीस। कहिथे ना "अति के अंत घलो होथे।"
का हे पूरा मामला? (मायाजाल के कहानी) :-
ग्राम करैठी के रहने वाली गणपतिया बाई बछेल (60 वर्ष) ह स्व-सहायता समूह के अध्यक्ष बनके अइसन खेल खेलिस कि सब झन देखत रही गे। डोकरी हा सीधा-सीधा महिला मन ल झांसा दीस अउ उंखर नाम ले 8 लाख 85 हजार रूपया के लोन निकलवा लिस। अब पइसा हाथ मा आइस त डोकरी गणपतिया बाई के नियत डोल गे। अपन बर ऐश-ओ-आराम बर समूह के पइसा ले ओहा अपन घर बर टीवी, फ्रिज अउ कूलर खरीद लिस।
शेयर बाजार के चस्का : एतके नइ, डोकरी गणपतिया हा शेयर मार्केट मा घलो पइसा झोंक दीस, ये सोच के कि रातों-रात लखपति बन जहूँ। फेर र ए पइसा हा गणपतिया ला ले डूबीस।
2 साल ले चलत रहिस 'लुका-छिपी' :-
पइसा डकार के आरोपी महिला ह फरार हो गे रहिस। पुलिस ह ओकर खोज-खबर लेवत रहिस, फेर ओहा नागपुर मा जाके लुका गे रहिस। डोंगरगांव पुलिस ह घेराबंदी करिस अउ नागपुर के कलमना ले ओला धर के राजनांदगांव ले आनिस।
डोंगरगाँव पुलिस के 'सर्जिकल स्ट्राइक' :-
डोंगरगांव पुलिस हा बताइस कि महिला हा अपन जुर्म कबूल कर लिस हे। ओहा मान लीस कि समूह के पइसा ल ओहा अपन निजी काम अउ शेयर मार्केट मा उड़ा दीस हे। अब डोंगरगाँव पुलिस हा अब ओला कोर्ट मा पेश करके आगे के कार्रवाई करत हे।
Tags
Dongargaon
